Beyanameza YNK ji bo salvegera komkujiya Heebçe

Be boney 21-emîn salrojî karesatî Helebce we

- Xelkî têkoşer û stemdîdey Helebce
- Kesûkarî serberzî şehîdanî Helebce
- Xelkî têkoşerî Kurdistan

Karesatî kîmyabaranî Helebce, ke hemîşe birînêkî qûlî gelekeman û mirovayetiye û rojêkî tarîke le mêjuwî Kurdistan û xalêkî reşe be nêwçewanî encamderanî û şermezarîşe bo hemû ew layenaney ke rojgarî rûdanî ew tawane bê dengîan le beramberî da helbijard, ew karesate ke serencam û sereray hemû ew xuwên û qurbaniyey ke lêyî kewtewe belam bûwe nasnamey gelêk ke be deyan sal bû eçewsênrayewew kuşt û bir ekira û kesîş dengî lêwe nehat, karesatî Helebce, gerçî bo rijêmî rûxawî Sedam Hisên nebuwe hokarêk bo ewey îtir dest le dirindeyî biparêzê û ewebû duway ewe enfalî be ser gelekeman da hêna, belam bêguman lew rojewe îtir urde urde dinya hatewe hoş xoyî û têgeyiştin ke ew sîstime nêwdewletiyey ewsa bote çi nawendêk bo dirustkirdinî kesanî dirindew diktator û bote hokarî peydabûnî rijêmî aweha xuwên rêj ke le riştinî xuwênî hawwilatiyanî resmî xoyşî sil nekatewew le pênawî manewey xoy û bala destî xoy amadeye ke hezaran kesî bê tawan be çekî komelkuj le nawberê, boye karesatî Helebce ke karesatêkî bê wêne û birînêkî hergîz sarêj nebuwî gelekemane belam karesatêkîşe ke mêjûyekî nuwey le duway xoy bo gelekeman nexşand.

Her emeşe waykirduwe ke hemû salê gelekeman bewperî serberziyewe yadî şehîdanî ew karesate bikatewe, le gelîş da le nawçew wilatî corawcorî dinya da, pêşrewan û helsûrawanî mafekanî mirov hawşanî gelekeman ew yade bikenewew bîkene boneyek bo hûşyarkirdinewey newekanî mirovayetî le metirsiyekanî hatine serkarî dîktatoran û xuwênrêjan.

Em salîş hemûman pêkewe yadî bîst û yekemîn salrojî ew tawane ekeynewe û wek rojêkî neteweyî û nîştmanî temaşay ekeyn, xoşhalîn ke gelekeman be berçawî xoyewe tawanbaranî ew karesate le qefesî tometbarî da ebînin û ew kesaneş ke mawn û tawanbarî ew keysen be sizay reway xoyan egen. Bêguman kes û karî xoşewîstî şehîdanî Helebceş seberzin bewey ke xuwênî rolekaniyan be fîroneçû û le sayey xuwênî hemû şehîdanî Kurdistan, ew rijême dirindeye le gorinra ke bê perwa xelkî Kurdistan û 'Îraqîşî be dirindanetirîn şêwaz ekuşt.

Karesatî Helebce, her leseretawe sereray ewey tawanêkî nax hejîn bû, belam le heman kat da buwe hewênî yekxistinî rîzekanî gelekeman û bizûtinewey kurdayetî le Kurdistanî 'Îraq da xiste ser rêgeyekî pir berhemtirî kurdayetî û têkoşan.
Emroş, ke hêşta zor le destkewtekanî gelekeman wedî nehatûn, hêşta zor metirsî le ser deskewte wedîhatuwekanîşman mawin, ebêt yadî Helebce wek hemîşe bikeynewe be hewênî yekêtî rîzekanî gelekeman û rêgenedeyn ke ew yekêtiye dirzî tê bikewê û twanaw dertanekanî gelekeman le ast erk û amancekanî em qonaxe paşekişe bika û lawaz bibêt.

Herwa lem yade da be pêwîstî ezanîn ke bang le hikumetî herêmî Kurdistan û hikumetî fîdralî Bexda’ş bikeyn ke be şêweyekî berçawtir û karatir pirojekanî awedankirdinewey Helebce bixene bernamey karîanewe ta le çend salî dahatû da Helebce bew şêwe şayisteye awedankirabêtewe ke barteqay ew hemû qûrbaniyaney bêt ke dawiyetî û barteqay ew naw û nawbang û ew pêge meziney bê ke le diniya û le naw gelekeman da heyetî.

Le kotayî da ebê ewe bilêyîn ke wefadarî bo Helebce le wedaye çon bitwanîn bergirî lew amanc û deskewtane bikeyn ke şehîdanî Helebce û şehîdanî gelekeman xoyan le pênawiyan da kirde qûrbanî, ew bergirîkirdineş teniya be we dête dî ke gelekeman yek deng û yek rîz bêt û yadî Helebce’ş şikodartirîn boneye ke hemîşe berew yekgirtuwîman biba û hemîşe pêkewe koman bikatewe.

Serberzin şehîdanî Helebce kesûkariyan
Helebce nawêkî hemîşe pîrozî mêjuwî gelekemane

Mektebî siyasî Yekêtî Nîştimanî Kurdistan
15/3/2009