Li Amedê milyonek dil bûn yek

Amedî di saetên sibê de ber bi qada Newrozê ve herikîn. Bajarê bi kesk, sor û zeran xemilî, bi wesayîtên hatine wezîfedarkirin û wesayîtên taybet ber bi qada Newrozê ve herikîn. Girseyê sloganên dilsoziya bi Rêberê Gelê Kurd Abdullah Ocalan re berz kirin û ber bi qada Newrozê ve herikîn.
Bi boneya Cejna Newrozê amedî duh di saetên serê sibê li derdora 07.00`an de rabûn ser piyan. Girseyên li nav taxan, kuçe û kolanan gihîştin hev agir pêxistin û li ber dahol û zirneyê govend girtin. Li deverên wekî Ben û Sen, Deriyê Merdînê, Baglar, Huzurevlerî, Peyas, Sûrîçî û gelek deverên bajar agirê Newrozê Amedê dorpêç kir. Her wiha li van qadan pankartên, "Newroz pîroz be" bi kurdî û tirkî hatin daliqandin. Jin, mêr, zarok, kal û pîr bi tevahî bi wesayîtan û meşê Parqa Newrozê vegerandin deryaya rengan.

CIL Û BERGÊN NETEWEYÎ
Piraniya beşdaran poşî avêtin ser milên xwe û cil û bergên neteweyî li xwe kirin. Girseya bi alên PKK`ê û posterên Rêberê KCK`ê Abdullah Ocalan daketin qadê, sloganên, "Bijî Serok Apo", "PKK gel e gel li vir e" berz dikin. Hemû riyên Amedê yên derdiketin qada Newrozê ji ber trafîkê xitimîn. Qada Newrozê wekî dilê Amedê diavêje lê deverên din ên bajar niha de ketine nav bêdengiyek kir. Ji gund û navçeyan jî bi wesayît û traktoran gel ber bi qada Newrozê ve dimeşiyan.

COŞA BI MEŞ...
Ji navçeya Bismilê bi sedan kesên li trenê siwar bûn li Kuruçeşmeyê hatin cem hev û ber bi qadê ve meşiyan. Ji ber ku bi sedan wesayît ketin qada Newrozê riya Rihayê ji trafîkê re hate girtin û wesayît demek dirêj rawestiyan. Kolana balefirgehê, Werçerwa Kantarê jî ji ber wesayîtan xitimî. Hevserokê DTP`ê Ahmet Turk, parlamenterên DTP`î, parlamenterên DEP`ê yên berê Leyla Zana û Hatîp Dîcle kincên neteweyî li xwe kirin û li protokolê cihê xwe girtin.
Pîrozbahiya Newroza Amedê ku bi slogana "Li dijî înkar û îmhayê çareseriya demokratîk" bi tevlêbûna sedhezaran kesan tê lidarxistin, di destpêka pîrozbahiyê de ji bo kesên di têkoşîna aştî û azadiyê de jiyana xwe ji dest dane rêz hate girtin.
Li Amedê pîrozbahiya Newrozê ku bi slogana "Li dijî înkar û îmhayê, çareseriya demokratîk" pêk hat û zêdetirî milyonekê kes beşdar bûn, bi rêzgirtina ji bo kesên di têkoşîna aştî û demokrasiyê jiyana xwe ji dest dane dest pê kir.

QAD HEJIYA
Di Newroza Amedê de Koma Gulên Xerzan, Zozan, Xêro Abas, Diyar û Aram derketin ser dikê û bi stranên xwe Newroza gelê kurd pîroz kir. AMED / DÎHA