Dihunê hilbijartinên şaredariyan yên Tirkiyê û bakurê Kurdistanê hatin pêkanîn. Sindoqên hilbijartinan demhijmêr bi 16:00 hatine girtin. Her çend li gelek deverên Kurdistan û Tirkiyê ji aliyê hêzên leşkerî yên Tirk ve astengî û pirsgirêk, an jî hîle û fêl hatibin kirin jî, li gorî hilbijartinên demên derbasbûyî, bi beşdariyekî zêde hilbijartin pêk hatin.

Li Kurdistanê partiya Kurdan DTP bi ser ket

Di hilbijartinên şaredariyan yê 2004 ê de jî DTP li gelek bajarên Kurdistanê dengê Kurdan girtibû û bi ser ketibû. Lê dihunê li gorî salên bihurî bi cûdayiyekî zêde DTP da pêşiya partiyên Tirkiyê yên dîtir. DTP di hilbijartinên 2004 ê de Amed, Êlih, Dêrsim, Şirnex û Colemêrg di dest xwede digirt. Di hilbijartinên dihunê de DTP Wan û Sêrt ji AKP girtin, Idir jî ji MHP girt. 

Eynika daxwaza çareseriyê 

Di van hilbijartinên dihunê de jî derket holê ku gelê Kurd bi parçebûn û pirsgirêkên nava xwe jî, çavlirê û daxwazvanê jiyanekî bi aşîtî, jiyanekî serbest û jiyanekî Kurdewarî ye. Bi salan bi rêka partiyên olî, an jî partiyên nijadperest yên wekî MHP, an jî di bin navê çepgirî û demokratan de yên wekî CHP li Kurdistanê siyasetekî gemar û kirêt hate meşandin. Hertim partiyên li herêmê bi hêzên çekdarî re bûne yek û raman û hêza kurd ya siyasî û ya demokratîk tepeser kirin. Ji ber vê yekê tu demê di astekî sedî sed de bîr û raya Kurd ne rêjaye hola demokratîk û ne ketiye nav sindoqên hilbijartinan de. Berî hilbijartinên 29 ê Adarê jî partiya desthilat AKP xebatekî bê hempa ya aborî û devkî kir da ku Kurdistanê bidest bixe û pêşî li partiya Kurd DTP bigre. Lê vê carê rewş hatibû guhertin. Cîhan ne cîhana berê bû, her çend ne bi dilê serdestên Tirkiyê jî be êdî diviya bi berçavikekî din temaşeyî kêşe û pirsgirêka Kurd bikin. Di encama tekoşîna Kurdan ya 40 salên dawî de û li gorî pêşveçûn û guhertinên cîhanî, derfet hatibû afirandin ku Kurd vîn û hêza xwe bi xwe hilbijêrin. Her çend eve têrê nebe jî pêngavekî payebilind bû.

Diyare ku ji îro pêve êdî Tirk jî û Kurd jî dê tevayî giraniya xwe bidin ser siyasetê û serkeftinên siyasî.